Koreja e Jugut planifikon satelitin e parë spiun
Koreja e Jugut ka njoftuar sot se synon ta lëshojë satelitin e parë spiun të prodhuar nga dora e vet në fund të këtij muaji, në mënyrë që ta monitorojë më mirë Korenë e Veriut, e cila po e zgjeron arsenalin e armëve bërthamore.
Vetëm pak ditë më parë, Koreja e Veriut dështoi në zotimin e saj për të tentuar për herë të tretë ta lëshojë satelitin gjurmues në tetor, me gjasë për shkak të telasheve teknike. Jeon Ha Gyu, zëdhënës i Ministrisë së Mbrojtjes të Koresë së Jugut, tha të hënën se sateliti i parë spiun i ushtrisë së vendit do të lëshohet nga Baza e Forcave Ajrore të Kalifornisë, Vadenberg, më 30 nëntor.
Sateliti do të bartet nga raketa Falcon 9 e kompanisë SpaceX. Në kontratën e saj me SpaceX, Koreja e Jugut planifikon t’i lëshojë edhe katër satelitë spiunë deri në vitin 2025, sipas Ministrisë së Mbrojtjes së Koresë së Jugut.
Koreja e Jugut nuk ka satelitë të vet spiunë dhe varet nga satelitet spiunë të Shteteve të Bashkuara për t’i vëzhguar lëvizjet e Koresë së Veriut. Agjencia e spiunazhit e Koresë së Jugut tha para ligjvënësve se Koreja e Veriut me gjasë po merr asistencë teknologjike nga Rusia për programin e vet të lëshimit të sateliteve spiunë.
Shërbimi Kombëtar i Inteligjencës tha se Koreja e Veriut është në fazën përfundimtare të përgatitjeve për lëshimin e tretë, i cili mund të jetë i suksesshëm, sipas tij. Koreja e Jugut, Shtetet e Bashkuara dhe qeveritë e tjera të huaja besojnë se Koreja e Veriut po kërkon armë të sofistikuara teknologjike nga Rusia për të modernizuar programet e veta të armatimit, në këmbim të furnizimit të Rusisë me municion, raketa dhe pajisje ushtarake për luftën e saj në Ukrainë. Rusia dhe Koreja e Veriut i kanë hedhur këto pretendime. /REL
Hello.al
