SHBA kërcënon ndalimin e TikTok nëse Kina nuk shet aksionet
Administrata amerikane ka njoftuar se TikTok duhet të transferohet në pronësi të re ose në të kundërt do të përballet me një ndalim potencial në vend.
Aplikacioni për ndarjen e videove, i zotëruar nga kompania kineze ByteDance, është akuzuar për të paraqitur një rrezik për sigurinë kombëtare përmes të dhënave të grumbulluara nga miliona përdorues.
Një kërkesë për transferim të pronësisë, e raportuar fillimisht në Wall Street Journal (WSJ), u konfirmua nga TikTok për BBC News.
Kompania deklaroi se një shitje e detyruar nuk do të ndryshonte rrjedhën e të dhënave ose aksesin e saj. Për vite, zyrtarët amerikanë kanë shfaqur shqetësime se të dhënat e TikTok mund të kapeshin nga qeveria kineze.
Sipas WSJ, administrata e presidentit amerikan Joe Biden dëshiron që ByteDance të hiqet nga TikTok për të krijuar një ndarje të qartë nga Kina.
Komiteti për Investimet e Huaja në Shtetet e Bashkuara (CFIUS), i cili monitoron rreziqet e sigurisë kombëtare, rekomandoi tërheqjen e ByteDance nga TikTok.
Një zëdhënës i TikTok tha se nuk kundërshton lajmin e WSJ dhe konfirmon se ishte kontaktuar nga CFIUS.
“Nëse mbrojtja e sigurisë kombëtare është qëllimi, transferimi i pronësisë nuk zgjidh çështjen: një ndryshim në pronësi nuk do të vendoste kufizime të reja në rrjedhën e të dhënave ose aksesin. Mënyra më e mirë për të adresuar shqetësimin në lidhje me sigurinë kombëtare është mbrojtja transparente e bazuar në SHBA e të dhënave dhe sistemeve të përdorura nga SHBA”, tha zëdhënësi.
TikTok mund të grumbullojë të dhëna biometrike nga përdoruesit dhe ka qasje në të dhënat e vendndodhjes. Frika është se informacioni mund të transferohet te qeveria kineze.
Kompania i ka thënë BBC News se vazhdon të planifikojë të ecë përpara me atë plan. TikTok është i ndaluar në telefonat qeveritarë në SHBA, Kanada dhe BE.
Hello.al
